Somalisk litteratur i oslo

Fyrste helga i mai er det somalisk litteratur, poesi og identitet som står i fokus på Litteraturhuset i Oslo. Ein av forfattarane som kjem, er den prislønte forfattaren Nadifa Mohamed. Det er den somaliske diasporaen – somaliske forfattarar som bur utanfor heimlandet – som er tema denne gongen. Det handlar altså om å stå med føtene i to ulike kulturar, og korleis dette dilemmaet ter seg i litteraturen.

Nylesing av aksel Sandemose

Den populære serien «Fortidas folkelesing» på Nasjonalbiblioteket held fram. Denne gongen har Kjersti Annesdatter Skomsvold lese Aksel Sandemose for fyrste gongen. 13. mai fortel ho om far til den illgjetne Jantelova; ho vil her freiste å finne mennesket attom dei mange mytane om Sandemose. Føredraget blir lansert som bok same dag.

Dracula på Island

I 1897 kom Bram Stokers roman Dracula. Berre tre år etter kom historia som avisføljetong i den islandske avisa Fjallkonan (Fjellkvinna). Tittelen på islandsk var Makt Myrkranna (Makta av mørkret). Føljetongen var skriven av Valdimar Ásmundsson og kom seinare ut som bok. No er boka omsett attende til engelsk, med tittelen Powers of Darkness: The lost version of «Dracula». Ásmundsson har sprita opp forteljinga endå meir med blod og gørr, men òg norrøn mytologi. Det som gjer det ekstra spennande, er at det er mogeleg denne versjonen byggjer på eit eldre utkast til Stokers Dracula som Ásmundsson hadde fått tak i.

ronny@dagogtid.no