Stendig fleire kulturminneplanar

I år får 57 kommunar midlar frå Riksantikvaren til å laga kulturminneplan. Dermed er tre fjerdedelar av kommunane i landet i gang med – eller har vedteke – å lage ein slik plan, melder Riksantikvaren på nettsidene sine.

«Vi er veldig glade for at så mange kommuner tar aktivt grep for vern og bruk av kulturminner. Vårt mål er at 90 prosent av alle landets kommuner skal ha en kulturminneplan innen 2020. Det målet tror jeg at vi skal nå», seier riksantikvar Jørn Holme i pressemeldinga.

Gjennom prosjektet Kulturminner i kommunen (KIK) får kommunane stønad til å utarbeide ein kulturminneplan, som til slutt blir politisk vedteken. Mange kommunar samarbeider med historielag og andre friviljuge organisasjonar om innhaldet i kulturminneplanen. Med tildelinga i år har meir enn 300 kommunar motteke støtte frå Riksantikvaren sidan 2011.

Fritt Ords Honnør til Kristin Clemet

Fritt Ords Honnør går til Kristin Clemet for den mangeårige innsatsen hennar for ein kunnskapsbasert og sakleg offentleg debatt, og for å gjera tankesmier til ein viktig del av denne debatten, heiter det i pressemeldinga frå Fritt Ord.

Stiftinga legg vekt på at Clemet har lyft fram nye problemstellingar gjennom den liberal-konservative tankesmia Civita, fått nye og unge røyster inn i samfunnsdebatten og vitalisert ideologisk og politisk diskusjon både i og utanfor partia.

Ny plate frå Prince

I dag, fredag 21. april, er det eitt år sidan Prince døydde. Det blir markert med EP-plata Deliverance, med «ny» musikk frå artisten, spelt inn i åra 2006–2008. Tittelsporet er alt tilgjengelig gjennom blant andre iTunes og SoundCloud. Det er den faste studiokompanjongen til legenda, Ian Boxill, som lanserer plata.

ronny@dagogtid.no