«Typisk norsk – ikke bare norsk»

EU har vedteke å gjennomføre eit europeisk kulturarvår i 2018. Dette blir markert i Noreg og resten av Europa med mål om at flest mogeleg skal utforske, verdsetja og reflektere over ein rik og mangfaldig europeisk kulturarv. I Noreg har Riksantikvaren, Nasjonalbiblioteket, Kulturrådet, Arkivverket og Kulturvernforbundet gått saman om å markere det europeiske kulturarvåret, skriv Riksantikvaren på nettsidene sine.

Kulturpåverknad og europeiske impulsar er tema for dei norske markeringane, med slagordet «Typisk norsk – ikke bare norsk». Det vil bli lagt vekt på at kulturarv i Noreg er resultatet av gjensidig og kontinuerleg påverknad, kunnskap og impulsar frå andre kulturar.

Ny teikning av van Gogh oppdaga

Ei hittil ukjend teikning av Vincent van Gogh frå våren 1886 er oppdaga. Slike funn er sjeldsynte. Dette seier ein representant for Van Gogh-museet i Amsterdam til den nederlandske avisa Volkskrant: «Sidan katalogen over samla verk vart lansert i 1970, er det berre vorte tilført seksten nye verk av van Gogh».

I 2013 undersøkte kunsthistorikar Fred Leeman eit nyinnkjøpt bilete hjå eit ektepar som samla på impresjonistisk kunst. Teikninga minte om van Goghs strek. Det var tale om ei teikning av høgdedraget Montmartre i Paris. Etter detektivarbeid fann han ut at det måtte dreie seg som ei teikning van Gogh laga våren 1886, som sidan vart seld i England, og deretter hamna hjå ein nederlendar, før det «hamna under radaren». Også i 2013 var det stilt, for eigaren ville ikkje gå ut med nyhendet. Men no blir funnet lansert, for teikninga skal stillast ut på kunstmuseet Singer i den nederlandske landsbyen Laren.

Joggesko som billett

I år fyller joggeskoen nitti år. Trafikkselskapet i Berlin vil gjera ære på skoen, og det gjer dei på ein original måte. Saman med Adidas produserer dei eit avgrensa opplag på 500 eksemplar av joggeskoen. Denne skoen kan du kjøpe og bruke som billett i kollektivtrafikken. Skoen blir då eit alternativ til det vanlege chipkortet som gjeld i kollektivtrafikken i den tyske hovudstaden.

Korleis er det mogeleg? I skoen er det plassert ein chip til automatane ved tyske bussar og T-banar. Eit par sko kostar 180 euro, medan eit årsabonnement er på heile 760 euro. Så det er eit godt kjøp. Men det følgjer eit vilkår med kjøpet: Du må ha skorne på deg når du reiser. Du reklamerer i tillegg for kollektivtrafikken, for skorne er i fargane til Berlins kollektivtrafikk.

Ronny Spaans