UFO-hytta

I år er det 50 år sidan det såkalla Futuro-huset vart sett i produksjon. I Noreg finst det framleis eit eksemplar av dette huset, som representerer noko av det mest underlege arkitekturen har bore fram. I dag er Futuro-husa kultobjektet, melder Riksantikvaren på sidene sine.

Vandrar du i landskapet kring idylliske Nevlunghavn i Larvik kommune, kan du brått støyte på ein snål «farkost» ved ein stikkveg. Det liknar på ein UFO som har landa for eit par tiår sidan, men som ingen enno har oppdaga. Futuro-huset er frå Finland. Det ser ut som noko frå finsk fjernsynsteater, men det er eit ferdighus designa for industriell masseproduksjon og for montasje kvar som helst. Arkitekt er Matti Suuronen. Kva det skulle brukast til? Det var Suuronens svar på korleis framtidas hytte burde sjå ut.

Kaizers plass på Bryne

Bandet Kaizers Orchestra har gjort suksess i heile Noreg, og i utlandet. Frontfigur Janove Ottesen og gitarist Terje Winterstø Røthing har vorte profetar i eige land, iallfall om vi skal døme etter eit initiativ i Time kommune. For no er Kaizers plass opna i Bryne sentrum. Det er fyrste gong i noregssoga at levande artistar blir heidra med eit torg. Men det er ikkje semje i Bryne om valet. Namnestriden kløyvde kommunestyret i Time, mange politikarar ville heller kalle torget opp etter den historiske omgjevnaden og kalle det Møllerplassen. Men tilhengjarar av bandet vann med éi røysts overvekt. Språkrådet var òg inne i biletet. Dei seier at stader ikkje bør kallast opp etter personar som framleis lever.

ronny@dagogtid.no