Filmproduksjon

Eva Aalberg Undheim

eva@dagogtid.no

Danske politikarar skal i haust forhandle fram ein ny fireårig avtale for finansiering av dansk filmbransje. No har Dansk Folkeparti varsla at det går til forhandlingane med krav om å flytte Den Danske Filmskole og statlege Dansk Filminstitutt ut av København. Det skriv avisa Fyens Stiftstidende.

Partiet føreslår å flytte institusjonane til byane Odense og Svendborg på Fyn og grunngjev det med ønske om betre geografisk balanse og fleire filmar som appellerer til eit breitt publikum. Danske filmskaparar er i dag for københavnorienterte, ifølgje Alex Ahrendtsen, som er kulturpolitikar i Dansk Folkeparti.

Ei undersøking frå Dansk Filminstitutt har synt at opp til 87 prosent av dei som jobbar med film i Danmark, bur i hovudstadsområdet, og at 63 prosent av foreldra deira òg bur i hovudstaden eller på Sjælland.

Leiaren for filminstituttet og rektoren ved filmskulen har begge åtvara mot ei flytting.

– Den avgjerande negative konsekvensen er at det vert svært vanskeleg for oss å tiltrekkje oss dei rette undervisarane. Ein stor del av dei vi har i dag, er deltidstilsette, fordi dei òg jobbar i andre delar av filmbransjen med å lage film, seier rektor Vinca Wiedemann ved filmskulen.

Verken Det Konservative Folkeparti eller Venstre vil avvise forslaget frå Dansk Folkeparti, ifølgje avisa, men sosialdemokratane har uttrykt skepsis. Kulturminister Mette Bock frå Liberal Allianse har ikkje ønskt å kommentere saka. Forhandlingane om ein ny filmavtale startar i oktober.