FESTIVALFILM

Regi: Annika Berg

Team Hurricane

Med: Eja Penelope Roepstorff, Sara Morling

Åtte veninner i tenåra vil gjere det meste ut av sommaren då ungdomsklubben skal stenge. Dei driv rundt og pratar med kvarandre og kamera. Ei heimespøta utstilling skal sikre at dei stengjer med ein smell. Dette er filmen kritikarar har kasta lovord etter sidan premieren i Venezia med referansar til Skam, Lukas Moodyson, Harmony Korine og Jean-Luc Godard.

Teenage Kicks

Orkanen Team Hurricane kastar tusen tema mot deg, nokre tullete og andre gravalvorlege. Depresjon, sex, sexisme, samhald og einsemd gjev tyngde mellom tyggjegummi og kakao. Jentene poserer og filosoferer. Tant og fjas er rørt saman med fin djupn. Jentene sparkar freidig oppover mot det heteronormative patriarkatet. Den danske debutanten Annika Berg vekkjer mange tankar rundt ungdomsliv og eksperimenterer artig med mockumentarsjangeren. Filmen er ikkje feilfri, men heller aldri keisam.

Frisk og ny

Uttrykket er rått og kantete. Estetikken er prega av Snapchat og musikkvideoar frå stordomstida til MTV med skrikande neonfargar. Berg fann skodespelarane på Instagram og har stolt fylt fagfunksjonane med berre kvinner. Dynamikken er ikkje dum. Gjengen har talent og mot på alle frontar. Det er herleg å sjå noko som skil seg skikkeleg ut frå filmmengda. Fargane heng ikkje på greip. Den intenst fargerike opplevinga er òg frenetisk i klippen. Team Hurricane er forfriskande. Denne filmen skulle helst ungdom og vaksne over heile landet ha sett.

Håkon Tveit

Håkon Tveit er lektor i latinamerikansk kultur og historie ved Universitetet i Bergen og fast filmmeldar i Dag og Tid.

Filmen går på Oslo Pix i helga.