Animasjon

Regi: Makoto Shinkai

Weathering with you (Orig. tittel: Tenki no ko)

Stemmer: Kotaro Daigo, Nana Mori, Shun Ogori
Kinofilm

Hodaka (Daigo) har rømt frå øya der han går på vidaregåande skule, for å finna lukka i Tokyo. Det regnar ustoppeleg, men unge Hina (Mori) har fått krefter som kan få fram sola i korte periodar. Kan godvêrsjenta og rømlingen løysa problemet med all nedbøren?

Eventyrleg spel

Eg veit ikkje heilt korleis eg skal ignorera at dei kloke hovuda i filmen på underleg vis avfeiar kontant at klimaendringar er noko menneske kan styra med, at det berre er noko som kjem og går. Uansett kva som gjer det – utsiktene til eit regn som aldri gjev seg, er noko eg som fastbuande i Bergen by kan sjå for meg som ein dyster framtidsrealitet. Då hadde eg nok med glede teke imot litt åndeleg draghjelp om det jaga vekk skyene.

Men magien i Weathering with you ligg mindre på dei magiske elementa og meir på det eventyrlege spelet av fargar og animasjonstriks som skapar ein effekt heva over sjølv det beste Studio Ghibli byr på i filmane sine (tenk på Min nabo Totoro, Chihiro og heksene og Katteprinsen, for å nemna nokre).

Manga for mange

Regissør og manusforfattar Makoto Shinkai skuldar mykje til anime-tradisjonen i Manga-bøkene, som var dei første til å ta historiene hans over i teikning

Og med den gigantiske suksessen Manga har hatt også her til lands, kan eg ikkje skjøna noko anna enn at dette er ein moderne klassikar, både for fanskaren og dei som berre vil sjå ein usedvanleg vakker, vellaga teiknefilm.

Brit Aksnes

Brit Aksnes er frilans kulturarbeidar og fast filmmeldar i Dag og Tid.