KOMEDIE

Regi: Tim Hill

I krig med bestefar (Orig.tittel: The War with Grandpa)

Med: Robert De Niro, Oakes Fegley, Uma Thurman
Kinofilm

Ed (De Niro) hamnar i trøbbel etter å ha tapt kampen mot ein betalingsautomat. Dottera Sally (Thurman) gjev han eit tilbod han ikkje kan seia nei til, og han flyttar inn hjå familien hennar. For å få plass blir barnebarnet Peter (Fegley) forvist til loftet, som om han ikkje hadde nok med å vere fersking på ungdomsskulen. Snart byrjar ein løynd krig mellom Ed og Peter.

Låg list

Opningsplansjane til familiekomedien tyder på film frå lågaste hylle. Kan røynde Robert De Niro ro det i land? Nei. Det er så eg saknar den skuffande The Irishman. Eg rekk å tenke at De Niro tar kvalitetsmessige kvileskjer, slik Christopher Walken pla gjere med B-filmar rett på video. Så dukkar Walken opp! Eit rart metahøgdepunkt. Verre er det med Uma Thurman. Som kvinne på femti er ho forvist til ei rolle som broderande, tyrannisk mor. Det må ha kravt stenge instruksar frå regissør Tim Hill å kue talentet.

Riv

Skodespelet er generelt grotesk, med barnestjerna Oakes Fegley som største syndar. Musikken er grufullt generisk. Slapsticken er høgfrekvent og av låg kvalitet. Eit sentralt tema er ny teknologi.

Eg er i målgruppa for sympati med mannen som hatar overdriven digitalisering og elskar papiravis og vinyl. Vitsane om sånt går diverre fort ut på dato. Desse luktar mugg. Ein vis mann sa at om du legg lista lågt nok, riv du ikkje. I krig med bestefar er unnataket som stadfestar regelen. Så dårlig film er sjeldan vare.

Håkon Tveit

Håkon Tveit er lektor i latinamerikansk kultur og historie ved Universitetet i Bergen og fast filmmeldar i Dag og Tid.