KOMEDIE

Regi: Yngvild Sve
Flikke

Ninjababy

Med: Kristine Kujath Thorp,
Nader Khademi, Arthur Berning
Kinofilm

Vimsete Rakel (Thorp) har rota det til for seg. Ho er gravid. Grådig gravid. Som singel i tjueåra er det først uråd for henne å vite kva fyllekule som har skylda. Kven er faren? Framande Aikido-Mos (Khademi) eller irriterande Pikkjesus (Berning)? Babyen har snike seg inn som ein ninja. Korleis kjem frisinna unge vaksne i dagens Oslo ut av ei slik knipe?

Peik

Yngvild Sve Flikke gjorde god litteratur til gøy film med Kvinner i for store herreskjorter, basert på Vente, blinke av Gunhild Øyehaug. Utgangspunktet for Ninjababy er den teikna romanen Fallteknikk av Inga Sætre. Flikke lukkast igjen.

No òg har ho forfattaren med på laget. Teikningane til Sætre er elegant inkorporerte og syner tankane til Rakel og sprø samtalar med fosteret. Dei bidreg til ein fjong stil som står godt til den lette tonen. Filmen kjennest fri. Dette er korkje ein peikefinger frå Ropstad eller ein pamflett frå Kvinnefronten. Forteljinga er forfriskande. Dialogen er kjekt spekka av kroppsvæsker og toskeskap.

Leik

Trass i fjas er filmen både rørande og meiningsfull. Å tora å tulla slik med tema av tung art krev sin eggstokk og finesse. Humoren held seg skarp og ledig. Ein skrattar ikkje høgt støtt, men finurlege innfall og frekke replikkar gjer at ein stendig har eit smil om munnen.

Den humoristiske teften til Nader Khademi og Arthur Berning er godt kjent. Kristine Kujath Thorp såg vi sist i Den største forbrytelsen. Skilnaden i stemning er stor. Ho viser breidde og har rikeleg med komisk talent. Kombinasjonen av uttrykksfull formidling av kjensler og eit friskt naturleg snakketøy gjer henne herleg i hovudrolla.

Ninjababy er godt balansert. Filmen er stillferdig energisk og hemningslaust leiken. Vi fråtsar ikkje i framifrå komediar her til lands. Når Yngvild Sve Flikke leverer to av to, har vi å gjera med ein frontfigur i norsk filmkomikk.

Håkon Tveit

Håkon Tveit er lektor i latinamerikansk kultur og historie ved Universitetet i Bergen og fast filmmeldar i Dag og Tid.