Animasjon for barn

Regi: Hiroyuki Morita

Katteprinsen (orig.tittel: Neko no ongaeshi)

Norske stemmer: Siri Nilsen, Christoffer Staib, Harald Heide-Steen jr.

Ungjenta Haru bergar ein katt frå å verta overkøyrd. Det viser seg at han er ein katteprins, og som takk skal ho gifta seg med han. For å få hjelp til å koma seg ut av denne kattepina kontaktar ho Kattekontoret. Saman med tjukkekatten Muta og den sofistikerte baron Hubert von Gikkingen dreg dei til katteriket for å ordna opp.

Nye lodd

Kva som gjer at Katteprinsen og ei rad andre Studio Ghibli-filmar har fått ny premiere 15 år etter fyrste runde på kino, er eg usikker på, men interessa for japansk animasjon har kanskje teke seg opp dei siste åra og fått eit kommersielt potensial som mangla på tidleg 2000-talet. Elles ville nok både denne, Min nabo Totoro (1988) og Prinsesse Mononoke (1997) vore typisk cinematek- og filmklubbmat. Og ja til mangfald for dei minste! Det er litt forvirrande at ein så barnsleg film som Katteprinsen handlar om ei jente som tydeleg må vera nærare tenåring, men filmen er uansett definitivt meir for små ungar enn mangaopphengde ungdomar.

Ope versus lukka

Som i alt anna det kjende Studio Ghibli kjem opp med, er det berre å legga nøkterne tankesett igjen utanfor kinodøra og lata ekte og indre ungar sleppa inn. At dyr tek menneskerollar, er sjølvsagt ikkje noko unaturleg i teiknefilmar. Det absurde ligg oftare i detaljane enn i at eit parallelt fantasiunivers med snakkande kattar finst. Og i universet til Katteprinsen bognar det av underlege karakterar, snurrige situasjonar og løgne matrettar. Det rår også ei slags gamaldags oppfatning om ekteskap og samfunnskonvensjonar som eg er mindre begeistra for. Når det er sagt, er eg generelt sett ikkje enormt begeistra for filmen samla sett heller. Du skal ha dette opne barnesinnet for å fullt ut setja pris på Ghibli-filmane, og der sit eg med det attlatne vaksensinnet mitt og skulle ynskja eg likte dei betre.

Brit Aksnes

Brit Aksnes er frilans kulturarbeidar og fast filmmeldar i Dag og Tid.