DRAMA

Regi: Kelly Reichardt

First Cow

Med: John Magaro, Orion Lee, Toby Jones
Kinofilm

Cookie (Magaro) er kokk for ein kjip gjeng på pelsjakt i Oregon på 1820-talet. Ein dag kjem han over ein naken mann i buskane når han sankar sopp. Mannen er King-Lu (Lee), ein kinesar som gøymer seg fordi han råka å drepe ein russar. Som han seier er «alle» i Oregon.

Dei to blir gode vener. Kreativiteten til gründersjela King-Lu og kokkekunsten til Cookie gjer dei til ein dynamisk duo når den første kua kjem til utposten der dei slår seg ned, men all forretning inneber risiko.

Nedtona

First Cow er ikkje ein actionfilm frå Det ville Vesten. Dels er filmen ei miljøskildring, men mest er det ei historie om vennskap mellom to ulike figurar som båe står litt på utsida av fellesskapar. Ein ser få spor av den valdelege koloniseringa. Det er uvant å sjå fredsæl sameksistens mellom ulike folkegrupper frå USA på 1800-talet, inkludert urfolk som held til i busetjinga.

Historia er enkel og liten, tatt ut av ein bit av romanen The Half Life av Jonathan Raymond. Når konfliktar dreg seg til, er det òg i sparsam stil.

Dramatikken er tona ned. Her er artige observasjonar og godlynt stemning. John Magaro og Orion Lee spelar avmålt og fint, i takt med den rolege rytmen som er typisk for regissøren Kelly Reichardt. Båe to har eit mildt vesen.

Nyting

Bileta har ein herleg tekstur og flotte fargetonar. Lyden av bekkar og buskar er detaljrik og sterkt subtil. Alt er stramt ramma inn og stødig fortalt. Det knakande gode handverket gjer filmen lett å nyte. Lausrive frå historia kan ein kose seg.

Utan store fakter fyk to timar fort. Reichardt har ein særeigen og sakte stil med god teft for dynamikk mellom menneske. Til liks med Chloe Zhao kallar ho fram noko som kjennest uramerikansk på ein god måte, langt vekke frå Hollywood i stil og sjel. Dei gjev breidde og håp for filmbransjen i USA. First Cow er ei ven og varm kinooppleving.

Håkon Tveit

Håkon Tveit er lektor i latinamerikansk kultur og historie ved Universitetet i Bergen og fast filmmeldar i Dag og Tid.