KRIM

Regi: Kenneth Branagh

Mord på Nilen (Orig.tit.: Death on the Nile)

Med: Kenneth Branagh, Gal Gadot, Armie Hammer
Kinofilm

Mord på Nilen av Agatha Christie har blitt film igjen. Kenneth Branagh har filmatisert ei bok av Christie igjen. Etter at meir filmkrimglade Brit brutalt slakta Mord på Orientekspressen og ville av på neste stasjon, mønstrar eg på.

Kanskje naive auge som må vente i spenning på kven mordaren er, set større pris på det påkosta gildet? Nei. Når klimaks etter lang (og lenger enn lang) ventetid kjem, har eg mista all interesse for kven som er mordaren.

Glorifisert venterom

Det går over ein time før nokon drep nokon. Før den tid er det mest mas om kjærleik og pengar. Mykje mas. Dei flauaste flosklar blir serverte som svisker på fin porselen. Kjærleiken er stor. Kjenslene er sterke. Dei pengesterke prangar. Intrigane er mange og meiningslause.

Som publikum skal vi misunne dei rike som har råd til eit overdådig cruise på Nilen. Sjampanjen og småkakene flyt til frekke tonar frå afroamerikanske damer med driv. Ferda er pynta med tause «eksotiske egyptarar» i kulissane.

Studiosviske

Ingen vitja Egypt for å lage filmen. Regissør Kenneth Branagh held seg helst heime. Uttrykket ber preg av at det aller meste er filma i studio. Datapyramidane er dårlege. Skodespelarane er tydeleg lausrivne frå bakgrunnar. Estetikken er prega av å vere galant glatt. Slikt skaper inga stor kinooppleving.

Etter kvart kjem vi til dei summariske forklaringane av Poirot (Branagh) som vi kjenner frå fjernsyn. Fleire poengterer at Poirot er glad i rampeljoset. Det har han til felles med ein malplassert Branagh. Han har vel hovudrolla berre fordi han bestemmer.

Den slappe regien kunne ha trunge meir konsentrasjon. I kjend stil pratar briten med tullefransk aksent, om lag like dumt som russisken Branagh stod for i den elles solide Tenet.

Gal Gadot er god, då. Den stjernespekka rollelista får elles få sjansar til å skine. Figuren til den alltid blasse Armie Hammer kjem i skade for å skildre filmen i ein replikk om noko anna: Han er upassande, melodramatisk og dummar seg ut.

Håkon Tveit

Håkon Tveit er lektor i latinamerikansk kultur og historie ved Universitetet i Bergen og fast filmmeldar i Dag og Tid.