Filmfjes

Agatha Christie rakk å skriva 73 romanar, 40 av dei om Hercule Poirot og 12 om Miss Marple, og alle desse har vore filmatiserte opptil fleire gongar. Ein av dei mest berømte, Mordet på Orientekspressen, er no klar for ny stjernefilmatisering. Boka kom i 1934, og det har kome fleire filmversjonar oppover. Den meste kjende kom i 1974 og hadde storleikar som Albert Finney, Lauren Bacall og Ingrid Bergman på rollelista. Denne gongen er det Kenneth Branagh som spelar Poirot. Store stjerner betyr ikkje alltid stjernekvalitet, sjølv med Christies fabelaktige plottmakeri som grunnlag. Premiere 10. november.

B.A.

Sjå på nett no:

(Netflix) Hurra for Mindhunter! Denne sannkrimserien om FBI-agentar på slutten av syttitalet som byrja interessera seg for psykologien bak seriemordarar, har det vore bygd opp forventningar til dei siste par månadene. Og så – halleluja – vert alle forventningane innfridde. I tillegg til å vera spennande og interessant er rollegalleriet nydeleg samansett med fine karakterar som slit med eigne meir personlege drama på fritida. Håpar det kjem ein million sesongar til!

B.A.

Tre på topp

Slasherfilmar frå gullalderen:

1) Motorsagsmassakren (Tobe Hooper 1974). Filmen med lugubre Leatherface endra spelereglane for skrekkfilmar og står sidan som ein påle i populærkulturen.

2) Halloween (John Carpenter 1978). Maska til mordaren Michael Myers og skrika til debutanten Jamie Lee Curtis var ikoniske. Kassasuksessen sette ein ny standard på godt og vondt.

3) Terror på Elm Street (Wes Craven 1984). Den kritiske sansen var ikkje stor då eg såg film om Freddy Krueger for tidleg i lag med vener som hadde snike seg til ein videokassett. Skrekken sit i.

H.T.