Filmfjes

Denne veka er det duka for den 75. filmfestivalen i Venezia, og arrangøren er bra stolt av hovudprogrammet sitt. Det skulle berre mangla at dei likevel får tyn for å henga att i gubbeveldet med berre éin kvinneleg regissør på plakaten: Fjeset til australske Jennifer Kent er det einaste kvinnelege blant 21 regissørar.

Programsjefen seier at han ikkje kan kvotera kvinnene inn, og at noko må skje tidlegare i prosessen.

B.A.

Sjå på nett no

(NRK) Samtidig som du må få med deg Bergman: Ett år, ett liv på kino, kan du sjå ein slags parallelldokumentar om livet til den svenske stiftaren av filminstituttet i Harry Schein – den utrulege historia (med den betre originale tittelen Citizen Schein). Den austerrikske overklasseguten måtte flykta frå jødeforfølgingane og enda opp med å bli ein av dei mest betydningsfulle mennene i underhaldningsbransjen i Sverige.

B.A.

Tre på topp

Naturkatastrofar bryr seg lite om kva som er in og ikkje, men katastrofefilmar går aldri av moten. Det viktigaste er at bygningar, dyr og menneske fyk hjelpelaust rundt.

Twister (1996) Å, tornadojakt er moro, då!

Bølgen (2015) Overraskande bra, ikkje berre til å vera norsk.

The Impossible (2012) Den minst festlege av topp-tre i og med at tsunamien her faktisk skjedde, men ein god film.

B.A.