Filmfjes

Ein sjeldan gong lyt også Hollywood-kjempar falla. At det skjer grunna skuldingar om seksuelt misbruk, er endå sjeldnare. Det er både trist og bra at superprodusent Harvey Weinstein har måtta ta konsekvensane av fleire tiår med uakseptabel oppførsel – trist fordi ein skulle ynskja menn som han visste betre, og bra av opplagde grunnar. Kor lenge han held fram med å vera persona non grata, er uvisst, men kona har gått frå han, og produksjonsselskapet han sjølv var med på å stifta, har gjeve han sparken.

B.A.

Sjå på nett no:

(NRK) Er det alltid slik at ein mordar er ein psykopat? Eller er ein psykopat alltid valdeleg? Den überhyggelege psykologen Uta Frith presenterer denne problemstillinga og er programleiar i den britiske dokumentarfilmen Kva er ein psykopat?. Myten er at dei er fødde utan empati, og at dei endar opp som mordarar. Forsking viser at nokre har betre anlegg for å utvikla psykopati enn andre, men finst det ein kur?

B.A.

Tre på topp

Filmar som kom på kino sist veke, då vi hadde hendene fulle med filmfestival i Bergen:

1) Good Time av Benny og Josh Safdie. New Yorks stjerneskotduo har laga ein frisk, fartsfylt og skiten film om småskalaskurkar og stor kjærleik mellom brør. Kjenslene flyg og synten strålar.

2) Hva vil folk si av Iram Haq. Haq er tilbake med ein smell. Sosial kontroll er handsama med nerve, mot og balanse. Maria Mozhdah debuterer med spel som står i stil til superstjerna Adil Hussain.

3) Tom of Finland av Dome Karukoski. Ein fin finsk film feirar landets store teiknar, kjend for lemmar og lêr.

H.T.