Filmfjes

Etter årevis med (overraskande) avslag frå Norsk Filminstitutt, kan endeleg regissør Anja Breien pryda spalta her, då det no ser ut som Hustruer – 40 år etter går til produksjon med god pengestøtte i ryggen. Suksessen Hustruer (1975) har fått to oppfølgjarar, og i den fjerde filmen er det altså aldrande kvinner som ser tilbake og framover. Som ein av få norske regissørar var Breien nominert til Gullpalmen for Arven i 1979. Eit solid fjes, med andre ord.

B.A.

Sjå på nett no

(HBO Nordic) Etter mange lange dagar i sola, eit fenomen eg sjeldan treng skulda på, vert det lite TV-sjåing, men ein passeleg guffen affære som høver for å få euforien over vêret ned på eit norsk nivå, er sannkrimserien Onde planer. Eit bankran med dødeleg utfall for han som utfører det, blir starten på ei opprulling av bisarre karakterar og bisarre omstende.

B.A.

Tre på topp

Dokumentarfilmar på Oslo Pix som folk i hovudstaden framleis kan sjå i helga.

1) Silvana – väck mig när ni vaknat. Silvana Imam er enormt kul. Rapparen talar fritt og rått. Denne dokumentaren er eit nært og fengjande portrett av ein særs populær og politisk svenske.

2) The Silence of Others. Framleis kviler Francos skugge over Spania. Offer for det brutale diktaturet kjempar for rettferd, sanning og slutt på ei amnestilov som sikrar historieløyse. Regjeringa Rajoy nektar.

3) Dreaming Murakami. Stilfullt skildra samtalar med den danske omsetjaren av japanske Haruki Murakami gjev innsikt i språklege nyansar, kulturelle skilje og kunsten å omsetje.

H.T.