Filmfjes

I fall du ikkje hugsar heilt korleis Tom Cruise ser ut, får du fjeset hans her. Grunnen er at han har vore på Preikestolen. Jepp, 56-åringen svingar seg frå hylle til hylle i den nyaste Mission Impossible-filmen, Fallout, sjølv om handlinga er lagd til Kashmir. Det er den sjette filmen i serien, og dei som likte dei førre fem, kan berre kjøpa kinobillettar og popkorn med eingong. Eller sjå om att ein av dei andre, om ein likevel har ein gamal DVD liggande.

B.A.

Sjå på nett no

(NRK) USA har ein president som med vilje skapar forvirring og skuldar massemedia for å lyga. Korleis stiller den framleis frie pressa seg til slikt som å bli utestengd frå pressekonferansar? Med New York Times – et år med Trump har regissør og produsent Liz Garbus hatt filmkamera inne i redaksjonen, der dei følgjer journalistar og redaktørar som viser kva som skjer før dei trykker på publiseringsknappen. Éin ting er å sjå i reprise alt det galne Trump har lirt av seg, det mest spennande er å sjå endringane i eit stort mediehus og kampen mot merkelappen «falske nyhende».

B.A.

Tre på topp

Moderne franske animasjonsfilmar:

1) Ernest & Celestine. 2012. Vekas premiereklare regissørar var involverte i ein film med fortryllande teikningar og engasjerande, hjartevarm historie. Dei norske stemmene er heilt topp.

2) Løvetannbarn. 2016. Denne filmen med stop motion av sveitsiske Claude Barras er genial. Figurane, fargane, formene og bodskapen fortener varm omfamning.

3) Trillingene fra Belleville. 2003. Sylvain Chomet vart skulda for plagiat, men uansett korleis det gjekk til, er resultatet ein unik teiknefilm med god, grovkorna og gamaldags stil.

H.T.