Filmfjes

Prestisjetunge Toronto International Film Festival startar denne veka, og den norske regidebutanten Camilla Strøm Henriksen er valt ut til programmet «Discovery: Directors to watch. The future of world cinema». Filmen hennar, Føniks, har vore undervegs i tolv år og har verdspremiere på festivalen. Noregspremieren er sett til 12. oktober. Fjeset hennar kjenner du kanskje frå TV-seriar som Hotel Cæsar og Hvaler. Morofakta: Ho er niesa til dama bak Titten Tei, Birgit Strøm.

B.A.

Sjå på nett no

(omgyes.com) Det finst mykje porno der ute på verdsveven, den klarar du sikkert leita opp sjølv, men her kjem eit tips hovudsakleg mynta på kvinner (altså ekstra viktig for menn): Nettsida OMGYes presenterer forsking kring kvinneleg seksualitet, kjem med direkte tips om kva som fungerer, og gjev namn til underleg lite omtalte seksuelle fenomen mest knytte til damer (Hinting, Edging, Consistency – gjenkjenneleg, ikkje sant?). Det burde seriøst vore folkeopplysing, særleg for folk i parforhold.

B.A.

Tre på topp

Ok, ikkje min favorittsjanger, men det finst artige vampyrfilmar, slike som desse:

What We Do in the Shadows (2014) Liksom-realityserie om frustrerte vampyrar på New Zealand.

Bram Stoker’s Dracula (1992) Har ikkje sett filmen sidan han gjekk på kino, men hadde plakaten på veggen i lang tid etterpå. Det får vera vitnemål godt nok.

Nosferatu (1922) Dracula blir ikkje styggare og skumlare og sprøare enn her.

B.A.