Filmfjes

Trass i dei skandaløse tilhøva sentralasiatar har arbeidd under for å byggja stadion, blir det uråd å sjå vekk frå skjermen under VM i fotball for menn, som no brakar laus i Russland. Igjen har Island med si magert busette øy kvalifisert seg til ei stor tevling. I mål står filmmannen Hannes Thór Halldórsson. Han har regissert musikkvideoar, klipt dokumentarfilm og slått England ut av EM, men størst av alt er truleg ein kamp som vikarmålvakt i 2012 for eit skaderamma Brann.

H.T.

Sjå på nett no

(Ikkje Filmgrail) Nemnde eg fotball-VM? Kanskje les du Dag og Tid i pausen av Marokko–Iran og tenkjer at du vil sjå ein av tidenes beste fotballfilmar frå Iran etter det store iberiske slaget seinare på kvelden. Offside (2006) av Jafar Panahi handlar om iranske jenter som vil snike seg inn på fotballkamp i strid med idiotiske lover. Filmen er fantastisk. Diverre lyg Filmgrail og lovar film på nett, men lenka sender deg til svenske Offside frå same år. Du lyt be om den iranske på biblioteket ein annan dag.

H.T.

Tre på topp

Her er tre andre Miyazaki-perler som alle bør sjå:

Chihiro og heksene: Fortryllande og magisk. Som Alice i eventyrland må ti år gamle Chihiro trå inn ei verd av rare, skumle skapningar for å berge foreldra sine.

Min nabo Totoro: Ein film utan skurkar, vondskap, slåsting – eller skumle skapningar. Ein film som viser ei verd vi alle vil leve i.

Nausicaä – prinsessen fra vindens dal: Mindre kjent enn Prinsesse Mononoke, men har til liks med den filmen to av Miyazakis varemerke: ein sterk kvinneleg rollefigur som må kjempe mot den menneskelege øydelegginga av naturen.

S.Å.