Filmfjes

Verdas største dokumentarfilmfestival, Hot Docs, går mot slutten i Toronto. I programmet finn ein berre éin norsk regissør i år: Håvard Bustnes har fått plass med Hatets vugge, som har vore på kino i Noreg i vår. Dokumentarfilmen er eit spennande innblikk hjå kvinnene som står i kjernen av det rasistiske, høgrepopulistiske partiet Gyllent Daggry i Hellas. At Bustnes er aleine som norsk filmskapar, er nytt. Dei to siste åra har Noreg stilt sterkt med ei mengd filmar og fått fleire gjæve prisar.

H.T.

Sjå på nett no

(YouTube) Hot Docs hyllar i år den legendariske dokumentarregissøren Barbara Kopple med eit eige program av høgdepunkt frå den rike karrieren hennar. Ho er kanskje mest kjend for debuten frå 1976, Harlan County, USA, som ho vann Oscar for. Historia om streikande gruvearbeidarar i Kentucky er framleis aktuell. Eit gjensyn med klassikaren passar godt helga etter 1. mai. Kampen held fram.

H.T.

Tre på topp

Godbitar frå programmet på Hot Docs i år:

1) Laila at the Bridge. Elizabeth og Gulistan Mirzaei. Laila er eit rivjern. Ho freistar få rusavhengige i Kabul friske. Då vi invaderte Afghanistan, skaut opiumproduksjonen i vêret, og landet har enorme rusproblem. Likevel har denne filmen humør og håp.

2) The Trial. Maria Augusta Ramos. 139 minutt med observerande film om riksretten mot Dilma Rousseff, utan forteljar eller intervju. Gu’ kor herleg!

3) Inventing Tomorrow. Laura Nix. Sjarmerande ungdomar frå Hawaii, Mexico, India og Indonesia gjev alt for å vinne på vitskapsmessa i Los Angeles med nye miljøløysingar.

H.T.