Coop sel bok

I førre nummer av Dag og Tid fortalde vi at Coop-kjeda vil byrja selja bøker i matforretningane sine. Små bokhandlar i distriktet er ikkje glade for dette. «Tar Tanum bestselgersalget fra oss, tar de levebrådet vår», seier Anitha Bendiksen på Andøy Bok og Papir til Klassekampen.

Forfattarlag fyller år

Ungdommens forfatterlag (ULF) vart stifta i 1947. I dag fyller laget som no heiter Norske barne- og ungdomsbokforfattere (NBU), sytti år, og det skal markerast. Å ha ei eiga forfattarforeining for dei som skriv for born og unge, er unikt i verdssamanheng. I jubileumsåret kjempar laget for skulebiblioteket. For å setja lys på dette gjev forfattarlaget bort ei gåve: Ti skulebibliotek ulike stader i landet får i desse dagar besøk av ein forfattar.

ORD VED Frode Granhus’ gravferd

Den populære krimforfattaren Frode Granhus døydde brått i heimen sin 15. september, 52 år gammal.

Tysdag vart han gravlagd heime i Lofoten. Kollega etter kollega har kome med minneord til Granhus. Tom Egeland skriv «Vi minnes ham som en strålende forfatter og et varmt og eiegodt menneske». Hans Olav Lahlum skriv: «Jeg så ham aldri ubekvem i møte med noen forfatterkollega eller leser, og kan ikke huske at jeg noen gang hørte ham si et negativt ord om noe menneske».

ronny@dagogtid.no