Jihadistpoesi

Litteraturhuset i Oslo har sleppt vårprogrammet. Dei fortel at dei mellom anna får besøk av Rachel Cusk i januar, som blir rekna som ein av Englands største forfattarar. I februar kjem den kjende forskaren på arabisk kultur, Elisabeth Kendall, og talar om poesi og heilag krig. Det få veit, er nemleg det at poesi står høgt hjå jihadistar. Osama bin Laden skreiv dikt. Leiaren av Al Qaida, Ayman al-Zawahiri, gjer det same, medan leiaren av IS, Abu Bakr al-Baghdadi, har ein doktorgrad i poesi.

På veg til Frankrike

Oktober forlag melder at Merethe Lindstrøms romanar Dager i stillhetens historie og Nord er selde til Frankrike. Bøkene skal koma ut på Editions Cambourakis. Lindstrøm vart tildelt Kritikarprisen og Nordisk råds litteraturpris for gjennombrotsromanen Dager i stillhetens historie. Boka er seld for omsetjing til 15 land. Rettane til Lindstrøms nye roman, Nord, vart seld til Sverige og Danmark alt før utgjevinga her heime.

Markies De Sade

I femtiåra vart Marki de Sades kjende verk 120 dagar i Sodom erklært forboden av franske styremakter. Skitne greier, var domen, som franskmenn bør skånast for. Men pipa har fått ein annan låt i dag. Manuskriptet har hamna på auksjon. «Nasjonal kunstskatt», seier den franske staten i dag. Styremaktene er difor på jakt etter ein pengesterk fransk kjøpar som vil syrgje for at verket blir verande på fransk jord.

ronny@dagogtid.no