Kråkevik som Lavransdatter

I februar neste år er det premiere på musikalen «Kristin Lavransdatter» på Den Nationale Scene i Bergen. Hovudrolla har ein av dei meste kjende artistane våre, Herborg Kråkevik. Det er tale om ei storsatsing, for det blir ein av dei største framsyningane til Den Nationale Scene nokosinne, med 33 skodespelarar og elleve musikarar i orkestergrava. Hans Marius Hoff Mittet spelar husbonden åt Kristin, Erlend. Stykket er basert på ein av dei meste kjende bokseriane i norsk litteratur: Romantriologien til Sigrid Undset. Regissør er Svein Sturla Hungnes. Brit Bildøen har gjeve tilskot til arbeidet med songtekstar, medan musikken er komponert av Julian Berntzen.

beste krimbøker

The New York Times har laga ei liste over dei beste krimbøkene i 2017. Her finn vi kjende namn for dei som er inne i sjangeren: The Force av Don Winslow, Fierce Kingdom av Gin Phillips og Two Kinds of Thruth av Harry Bosch. Men detektivromanen som blir nemnd fyrst, er The Thirst av Jo Nesbø. Tittelen er kort og greitt Tørst på norsk.

14 millionar til folkebiblioteka

Nasjonalbiblioteket tildeler 14 millionar kroner til arenautvikling i norske folkebibliotek i 2018. Til saman 142 ulike tiltak frå alle delar av landet har fått stønad.

 «Gjennom Nasjonal bibliotekstrategi vil vi satse på å utvikle folkebiblioteka som møteplassar, kulturinstitusjonar og arenaer for samtale og debatt, læring og demokrati. Det er imponerande å sjå alt ein har fått til av arenautvikling i folkebibliotek over heile landet. Vi ser allereie fantastiske resultat i form av rekordbesøk og eit høgt aktivitetsnivå», er kommentaren frå kulturminister Linda Hofstad Helleland i ei pressemelding frå Nasjonalbiblioteket.

ronny@dagogtid.no