Brynhild Bye-Tiller:

«100 meter-prosjektet»

Kunstmuseet Nord-Trøndelag

14. juni–4. august

Kvifor går vi, og kvar går vi? Utstillinga viser 18 portrett og utdrag frå 200 videosjølvportrett av born og unge som filmar seg sjølve medan dei fortel om ei kort strekning dei har sterke kjensler for. Brynhild Bye-Tillers arbeider i hovudsak med dokumentarfoto og sosialt engasjert kunst.

Leif Gabrielsen:

«I fjæra»

Samisk senter for samtidskunst, Karasjok

16. juni–26. august

Utstillinga viser 30 fotografiske skildringar frå kystkommunane Tana, Lebesby og Porsanger i åra 2012–14. Her kjem vi tett på menneska gjennom store og små hendingar. Landskapet og menneska i nord har vore viktige motiv for Gabrielsens sidan 60-talet.

Torbjørn Rødland:

Fifth Honeymoon

Festspelutstillinga i Bergen

Kunsthallen i Bergen

24. mai–12. august

Temaet for festspelutstillinga er bittersøtt: den femte bryllaupsreisa. Det er mange brostne håp og draumar i tittelen. Ein har knytt dei evige banda på nytt og på nytt, og reist ut på ei kjærleiksreise som det kanskje fell tungt å tru fullt og heilt på.

Hans Gjesme og årstidene

Sogn Kunstsenter, Lærdal

14. juni–12. august

Hans Gjesme (1904–94) viser ei utstilling på grunnlag av den omfattande Gjesme-samlinga på meir enn 1500 verk. Dei fleste motiva er frå lærdalstraktene, men nokre er òg frå Austlandet og Rondane. Måleria skildrar landskapa i ulikt vêr og til ulike årstider. Kunst og natur påverkar kvarandre, slik at ein oppdagar nye sider og kan sjå det kjende med nye auge. Landskapsbilete høyrer ikkje berre fortida til, men er uttrykk for kjærleik til ein natur som er ramma rundt Lærdal i dag.

Anish Kapoor:

«Space and Place»

Punkt Ø / Galleri F 15, Moss

30. juni–14. oktober

Utstillinga syner hovudverk frå 80-åra og fram til i dag av den indisk-britiske kunstnaren Anish Kapoor. I tillegg til grafikk og veggskulpturar viser F15 den store utandørsskulpturen «Sky Mirror». Skulpturen er forma som ei parabolantenne i blankt metall, og han er plassert slik at spegelbiletet av himmelen vert fanga i den vakre barokkhagen utanfor galleriet.

Felieke van der Leest

Kunsthuset Kabuso og Ingebrigt Vik museum, Øystese

2. juni–26. august

Felieke van der Leest skapar iaugefallande smykke. Arbeida er fylte med humor, men med eit uventa alvor. Her møter vi tema som miljø, sosiale problem og korleis vi behandlar dyr.