DRAMA/FANTASY/THRILLER

Regi: Fabio Grassadonia og Antonio Piazza

Sicilian Ghost Story

Med: Julia Jedlikowska, Gaetano Fernandez

Sicilian Ghost Story opnar med at kameraet kravlar oppover i eit underjordisk mørker, til smilande ungdom etter ein skuledag. Luna (Jedlikowsak) følgjer etter Guiseppe (Fernandez) inn i skogen for flørt og leik. Dei to trettenåringane er klassekameratar. Ho er så oppslukt av han som berre ungdom midt i den første store forelskinga kan vere. Den strenge mora til Luna vil ikkje at ho skal ha noko med Guiseppe å gjere. Då guten forsvinn, finn vi ut kvifor. Cosa nostras kvelande makt er nær.

Draumkvedet

Filmspråket er draumaktig, tidvis ekspresjonistisk. Kjenslene, inntrykka og draumane til Luna er utgangspunktet for verdsbiletet. Skilja mellom draum og røynd er ikkje alltid klare. Luna har eit lass med fantasi, slik teikningane hennar på veggen vitnar om. Lydbiletet er intenst. Nokre gonger minner det om den dyriske kakafonien i Hukkle av ungarske Györgi Pálfi. Dyrelivet figurerer elles flittig. Majestetiske hestar, farlege hundar, ei mystisk lita ugle og flakkande sommarfuglar florerer.

Det er ikkje utan grunn at utanlandske meldarar har trekt parallellar til Pans labyrint, men magien ber ikkje på fantasiskapningar i den forstand. Øya i mafiaens makt har skumlare skapningar i røynda. Rike bilete knytte til unge sinn står opp mot dei kalde realitetane og gøymestadane til øyas maktnettverk.

Mafiamakt

Filmen bygger på ekte hendingar frå nittitalet. Dei sicilianske skrømta er symbolske, sanne og mafiøse. Cosa nostra er dystre saker. I landsbyen er alle anten paralyserte eller involverte. Luna er ein fryktlaus rebell. Ho nektar å akseptere apatien lokalmiljøet viser andsynes dei organiserte kriminelle. Ho er fanga av forelskinga og fantasiane, fastsett på å finne Guiseppe. Løkka strammar seg òg om det skjøre sinnet og livet hennar. Spenninga i ungdommens vår mellom ein snill far og ei konservativ mor svinn hen for amputert barnleg uskuld. Slik blir oppvekstfilmen eit særskilt studium av Sicilias nære historie.

Ljos i mørkret

I byrjinga verkar skodespelet litt stotrande, men slik er ungdommar. Julia Jedlikowska veks inn i hovudrolla og har ei mengd sterke scener. Filmen varar i over to timar utan at det kjennest lenge. Som tidligare nemnt er Kritikarveka i Cannes ei kjelde til lovande nytt ljos på filmhimmelen. Regissørduoen Fabio Grassadonia og Antonio Piazza vann openberringsprisen der med den første mafiafilmen, Salvo i 2013. I år opna dei programmet med film nummer to, Sicilian Ghost Story, ei fin og annleis filmoppleving som fangar rå røynd med ungdommeleg fantasi.

Håkon Tveit

Håkon Tveit er lektor i latinamerikansk kultur og historie ved Universitetet i Bergen og fast filmmeldar i Dag og Tid.