Samtidsmusikk

Jørgen Træen & Stein
Urheim:

Krympende klode

Jørgen Træen, synthar, elektronikk, sampling, platespelar og perkusjon; Stein Urheim, strengeinstrument, elektronikk, sampling, trommemaskin, perkusjon, fløyter og munnspel
Hubro

Jørgen Træen og Stein Urheim inviterer oss inn i eit elektroakustisk univers som har mange fasettar. Lydbiletet kan til tider overvelda, men mykje av musikken er i korte snuttar attkjenneleg, ja, beintfram nostalgisk. Musikken er også ei hylling til pionerane i den elektroniske musikken, ifølgje Urheim, og spor av Raymond Scott, Delia Derbyshire, Harry Partch og Bjørn Fongaard kan finnast av den innvigde.

Samarbeidet mellom Træen og Urheim byrja så smått i 2010, då båe var med i Bjørn Torskes Planteband. Seinare har Træen miksa og produsert fleire av soloplatene til Urheim på Hubro. Musikken har blitt til litt etter litt, mellom anna då duoen deltok på ein eksperimentell konsertserie på Bergen kjøtt for fem år sidan. Samarbeidet vart lyfta til eit nytt nivå då Borealisfestivalen tinga eit verk av dei til festivalen i fjor.

Dei fem komposisjonane har alle svært ulik karakter både i tempo, tonalitet og kva del av instrumentariet som dominerer, men fascinerande musikalsk forteljekunst er det heile vegen. Det seier noko om mangfaldet når dei to låtane som skil seg mest frå kvarandre, «Kveldens varme elektriske mørke» og «Fugletyderens bevegelser», også er høgdepunkta på plata. Nostalgi treng ikkje vera keisamt.

Lars Mossefinn

Lars Mossefinn er frilans journalist og fast jazzmeldar i Dag og Tid.