Rock

The
Northern Belle:

Bats in the Attic

Die With Your Boots On Records

Fire strofer og eit refreng er alt Stine Andreassen treng for å trylle fram eit heilt lite univers i «Merchant Navy Hotel», eit høgdepunkt på Bats in the Attic, det dagferske albumet til The Northern Belle. Den stemningsfulle songen er, med sine livfulle scener, som ein liten spelefilm i miniatyr – verselinene er prega av ein eigen autentisitet, som om det som vert fortalt, er levt liv.

Ikkje overraskande, då, at nett det er tilfellet, og at det anekdotiske grunnlaget for skildringa finst i Andreassens eiga familiehistorie. Ein gong på slutten av 1960-talet vitja bestemora bestefaren, som var sjømann og låg til hamn i Middlesbrough. Dei drakk kaffi og såg spelefilmar i sjømannskyrkja, tok føre seg speleautomatane på hotellet, og dansa. «Merchant Navy Hotel» er merkt av ein elegant detaljrikdom, der filmrepertoaret i kyrkja seier noko om dei lengslene og fryktene menneske ber på, i møtet med sine eigne livslagnader, idet dei utfaldar seg.

Brev på loftet

Det var litt av ei gullgruve bandleiar Andreassen kom over då ho fann ein brevbunke på eit loft: Bestefaren hadde sendt fleire hundre brev til bestemora, i ein korrespondanse som levandegjer eit forhold som periodevis er prega av avstand. I «Our Own Frequency» får vi høyre om «your sweetest serenades/ then burning bitter lines», og i «Japanese» finst både misforståingar og oppklaringar i susen på telefonlina, der ei anna røyst enn den som finst i skrifta, slepp til. Ho som vart att heime, fantaserer om han som drog ut: Korleis høyrest namnet ditt ut på japansk?

Smakfullt og lett

I The Northern Belle finn du, forutan Andreassen (vokal og gitar), Bjørnar Ekse Brandseth på gitarar (inkludert steel), Johanne Flottorp på hardingfele og kor, Trym Gjermundbo på trommer, Ole-Andre Sjøgren på gitarar og kor, og Marie Tveiten på kor. Det musikalske uttrykket er smakfullt og lett, i den mjuke popenden av americana-spekteret. Snorre Kiil Saga er med på bass, Solveig Wang på tangentar, og Marcus Forsgren har produsert saman med bandet. Alt er solid til fingerspissane.

Bats in the Attic har ein slags tverrgenerasjonell glød over seg, sidan Andreassen også har vorte mor i perioden då albumet vart til, og nyfødd liv er tema i «Stargazer». Perspektivet tilfører materialet nye klangbotnar, i eit knippe songar som er menneskenære, og ikkje styrer unna livets store kontrastar og paradoks. Plata sirklar inn det som er nært, og det som er fjernt, for desse er ikkje faste storleikar, men snarare noko som er i rørsle livet gjennom – for besteforeldre så vel som for den oppveksande generasjonen.

Øyvind Vågnes

Øyvind Vågnes er forfattar, professor ved Universitetet i Bergen, og fast musikkskribent i Dag og Tid.