CD

Kjetil Hvoslef:

L’homme armé

Sjøforsvarets musikkorps, dir.: Ingar Bergby. LAWO 2021

Sjøforsvartes musikkorps held til på Bergenhus Festning og er det eine av to heilprofesjonelle orkester i Bergen (Bergen Filharmoniske Orkester er det andre). Den medvitne politikken deira med å engasjera vestlandske komponistar til å skriva tingings­verk, har vore givande; det provar dette albumet med tre stykke av Ketil Hvoslef.

Hvoslef, som er son av Harald Sæverud, høyrer til dei mest sjølvstendige og dyktigaste samtidskomponistane våre, med lita interesse for å fylgja motedrag i kunstmusikken. (Den einaste kontakten hans med kulturlivet er – ifylgje han sjølv – å lytta til italiensk radio.) Fantasi, gjerne med islett av barnleg nyfiken humor, kombinert med grunnsolid kompositorisk handverk, karakteriserer produksjonen hans, som gjennom snart 60 år har halde ein jamt høg kvalitet.

Tyrkisk tema

Det fyrste verket han skreiv til korpset, L’homme armé («Den væpna mannen») frå 2012, har gjeve albumet namn. Den fikse ideen bak stykket er typisk hvoslefsk. Uvanleg er derimot måten han konsiperer det på – framandt melodisk materiale, i tillegg til musikalske sitat frå dei tidlegare komposisjonane hans, spelar nemleg ei viktig rolle.

Verket krinsar kring det tyrkiske, eller rettare sagt: resepsjonen vår av det tyrkiske, ein veg han slo inn på av di vår tids korps ættar frå det osmanske janitsjarorkesteret. Utviklinga i komposisjonen er prega av 1500-talssongen «L’homme armé», som inneheld verselina «lat oss verna oss mot tyrkarane». «Marche pour la cérémonie des turcs» blir sitert i heilskap – dette herlege stykket pompøs, fransk barokkmusikk komponerte Jean-Bapiste Lully til Molières komedieballett Le bourgeois gentilhomme («Borgaren som adelsmann») i 1670. Hvoslef leikar her med materialet gjennom frie kontrapunkt og rytmiske variasjonar.

Ende i torskerusa

Ferskast er Cantus Lutra Lutra («Oterens song») frå 2018, ein dobbelkonsert for saksofon og slagverk som Hvoslef skreiv til minne om ein oter som enda sine dagar i torskerusa hans. Her skaper han ei djup og fasettert klangverd som andre komponistar berre ville klart med eit symfoniorkester til rådvelde. Konserten vitnar om Hvoslefs eineståande klangintuisjon som han realiserer med virtuos orkestreringskunst.

Sjur Haga Bringeland

Sjur Haga Bringeland er musikar, musikkvitar og fast musikkmeldar i Dag og Tid.