Jazz

PAT:

Super­golden

Kjetil Møster, saksofon og bassklarinett; Petter Asbjørnsen, bass; Øyvind Skarbø, trommer.
SMEIK SMKCD207

Petter Asbjørnsen trio, PAT, blei til medan Asbjørnsen var student ved Griegakademiet i Bergen. Seinare har studiar og karriere teke den 30 år gamle bassisten frå Larvik til København, Berlin og New York, men i mars 2018 vart Super­golden spelt inn i Duper studio med Jørgen Træen bak miksepulten. Som ein del anna som kjem frå Bergen, har plata vore vel verd å venta på.

Dei ni låtane til Asbjørnsen har ulike kjelder til inspirasjon og gjev trioen høgst ulike innfallsvinklar til improvisasjon. Både Ornette Coleman, Sonny Rollins, Dave Holland og Morphine er namn som fell ein i hug. Sjølv om improvisasjonen naturleg nok er eit berande element, har komposisjonane både særpreg og ei velutvikla form som gjer dei til noko meir enn eit springbrett for den spontane musiseringa.

Asbjørnsen kunne knapt fått med seg betre selskap til ei plate som denne. Møster har ei makelaus evne til binda saman musikalske idear til ei heilskapleg forteljing, og Skarbø er heile tida på høgd og understrekar og kommenterer. «Scheme» og den bluesinfiserte «Riot» er døme på den musikalske flyten som ein forventar går i ei bestemt lei, men som tek ei heilt anna retning som det mest naturlege og logiske i denne verda. Musikken har relativt fri form, men er gjennomført variert og melodiøs. Super­golden er ein sjeldan plante i jazzfloraen.

Lars Mossefinn

Lars Mossefinn er lærar ved Voss gymnas og fast jazzmeldar i Dag og Tid.