Jazz

Fredrik Lindborg Trio & String Quartet:

Riedel

Fredrik Lindborg, piano, Martin Sjöstedt og Georg Riedel (7), bass, Daniel Fredriksson, trommer, Daniel Migdal og Henrik Naimark Meyers, fiolin, Ylvali Zilliacus, bratsj og Amalie Stalheim, cello.
Imogena Records

Georg Riedel og familien flykta frå Karlovy Vary i 1938. Den korte soga er at han etter kvart blei ein leiande musikar i svensk jazzliv, der samarbeidet med Jan Johansson på Jazz på svenska er det ikoniske høgdepunktet. I tillegg er han òg ein folkekjær komponist som har sett musikk til filmar med Pippi Langstrømpe, Emil i Lønneberget og Alle vi barna i Bakkebygrenda.

Andre plata

På denne plata har Riedel komponert musikk spesielt for denne septetten. Dette er den andre plata til ensemblet. Den første plata A Swedish Portrait inneheldt musikk av barytonsakslegenda Lars Gullin. Riedel var eit naturleg steg nummer to. Dei åtte Riedel-komposisjonane har fått eit musikalsk apropos frå kvart av medlemene i septetten i tillegg til Riedel sjølv. Dette er korte manifestasjonar som anten legg seg tett opptil inspirasjonskjelda eller er meir musikalsk frittgåande.

Vakkert

Dette konseptet fungerer fint og aller best innleiingsvis med ein vakker cellosolo av Stalheim som fint går over i «Gullinarium». Her tek septetten ut heile potensialet i det musikalske idégrunnlaget. I mangel av akkordinstrument i ensemblet kjem strykekvartetten fint til sin rett, noko som på variert vis kjem fram i «Channánukka». Småpent heiter det på hoppspråket. Det uttrykket passar også her.

Lars Mossefinn

Lars Mossefinn er frilans journalist og fast jazzmeldar i Dag og Tid.