Mysteriet Ferrante

Elena Ferrante er eit kjent namn for norske lesarar; ho har gjort stor suksess med romanserien om to kvinner frå Napoli. Men ingen har visst kven som gøymer seg bak pseudonymet. Vel, i fjor vart omsetjaren Anita Raja lansert som personen bak Ferrante. Men no er atter eit nytt namn lansert: mannen til Raja, den italienske forfattaren Domenico Starnone. Det er altså ikkje ei kvinne, men ein gråhærd mann som står bak bokserien. Konklusjonen kjem frå åtte forskarar som har tekstanalyse som spesialitet, ved Universitetet i Padua.

Bøker i butikk

Coop – forbrukarsamvirket i Noreg – og bokhandelen Tanum, som Cappelen Damm eig, har underskrive ein storavtale. 700 av Coops daglegvarebutikkar får ein ny «ferskvare» attmed grønsaker, fisk og kjøt: bøker.

«Vi ønsker å legge enda bedre til rette for å spre den litteraturen kundene ønsker seg», seier Geir Inge Stokke, konsernsjef i Coop Norge.

Ibsen av Hjorth

Forlaget Oktober har saman med svenske Natur och Kultur og danske Rosinante sett i gang prosjektet NOR, eit samarbeid som har til mål å fremja god litteratur på tvers av landegrensene. Eit av samarbeida går ut på å invitere forfattarar til å skrive romanar inspirerte av Ibsens samtidsdrama. Vigdis Hjorth har takka ja til å skrive ein roman om Hedda Gabler.

ronny@dagogtid.no