SKREKKFILM/SVART KOMEDIE

Regi: Tyler MacIntyre

Tragedy Girls

Med: Brianna Hildebrand, Alexandra Shipp

Sadie (Hildebrand) og McKayla (Shipp) bur i ein søvnig by i Midtvesten der ein massemordar går laus. Jentene fangar fyren i løynd og vil skape seg eit namn på sosiale medium med å våge å ta debatten. Dei går over lik for å få flest mogeleg følgjarar. Frå første scene veit vi at det vil bli blod i rik mon.

Sjangersatire

Det haglar eksplisitte peik til skrekkfilmar frå Motorsagmassakren til Final Destination. Litt sjølvironi i at USAs ungdom ikkje har høyrt om eller kan uttale namn som Dario Argento, er ikkje dumt. Vaksne som ikkje lyttar til ungdom, er òg eit greitt spark. Tragedy Girls står i tradisjonen til sjangermedvitne satiriske slasherfilmar som nyare Scream og Scary Movie.

Det kryr av kløyvde skallar og parterte kroppsdelar i kreative vinklar. Her ligg diverre det einaste estetisk ambisiøse i filmen. Alle skodespelarane ligg i landskapet mellom parodisk og preglaus. Dei vekkjer ingen kjensler.

Asosiale medium

Å bli likt på sosiale medium trumfar alt. Figurane tullar med Tumblr og gjer alle videoar utruleg upworthy. Kritikken mot sosiale mediums antisosiale funksjon er skriven med store bokstavar. Likevel får fetisjeringa av jentene og blodbadet ein ekkel eim av verdilaus nihilisme. Eg lo ikkje ein einaste gong. Ikkje skvatt eg heller. Vonar ingen prøver dette heime, og at ingen ser denne filmen.

Håkon Tveit

Håkon Tveit er lektor i latinamerikansk kultur og historie ved Universitetet i Bergen og fast filmmeldar i Dag og Tid.