Petter Dass-dagane

Petter Dass-dagane har vore ein av dei mest sentrale kulturfestivalane i landet sidan 1983. 21. til 24. juni 2018 går dagane igjen av stabelen i Alstahaug. Motto for festivalen neste år er «Du skal holde hviledagen hellig». Festivalforfattar er Linn Ullmann, medan festivalkunstnar er Hugo Aasjord. Andre som blir å sjå på festen, er Liv Frøydis Berg og Morten Strøksnes. Det blir utandørs familiekonsert med Christine Sandtorv.

Vinje-senteret i kjømda

Neste år tek bygginga av eit Vinje-senter til i Vinje i Telemark. Vedtak om løyving av 24 millionar til bygging kom denne veka i kommunestyret i Vinje, melder Nynorsk kultursentrum. Kommunen vil halde fram med å skaffe midlar frå Kulturdepartementet og andre. Vinje-senteret har namnet sitt etter Aasmund Olavsson Vinje og blir eit senter for dikting og journalistikk.

Dei beste dikt- samlingane i år

Bok365.no har laga ei tilråding over dei beste diktbøkene i år. Dei er Tida er inne av Knut Ødegård, Vandreutstillinger av Cecilie Løveid, Barsel av Kristin Storrusten, Dette skjer ikke av Ida Lórien Ringdal og Jordsjukantologien av Stein Torleif Bjella. Dei to fyrstnemnde bøkene var elles mellom dei nominerte i kategorien lyrikk hjå Brageprisen. Du kan lese eit intervju med Løveid i avisa du no held i hendene.

ronny@dagogtid.no