ANIMASJON/MUSIKAL/FANTASY

Regi: Jayson Thiessen

My Little Pony Filmen

Med: Lise Mæland, Jannike Kruse

Prinsesseponni og mattenerd Twilight skal stelle til ein storslagen vennefest når Stormkongen kjem for å spreie styggeskap i Ponnyville. Han er så vond og dum at somme ser parallellar til presidenten i USA. Twilight og gjengen slepp unna invasjonen og freistar finne hjelp til å fjerne tyrannen.

Born av regnbogen

Leiarponnien lir av flink-ponni-syndromet og kjenner prestasjonspresset. Flokken på sju er stort sett stereotype ponniar med eitt triks kvar, frå primadonnaponni via gardstaus til ein androgyn regnbogeponni. Frøknene møter framande farar, men sjølv ein løgnaktig latinokatt kan bli til lur, reddande riddarrev. Denne figuren er eit slapt innfall. Når spenninga stig, skin moralen klart: Ein skal lita på venner og få med alle for å unngå utskot. Løysinga er som regel å snakke saman.

Rammeran

Ser ein glaset som halvfullt, er My Little Pony Filmen rik på referansar, men det kjennest mest som om soga stel skamlaust frå Ringenes herre, Star Wars og Løvenes konge. Det som strekker soga ut til lang langfilm, er sekvensar frå store salssuksessar. Litt gresk mytologi må med, inkludert ei trojansk kake. Forteljinga er ikkje fri for vittige detaljar. Estetisk er filmen ei enkel overføring frå fjernsynsseriens univers. Platt popmusikk dominerer lydsporet når ponniane ikkje plaprar. Det er mykje mas, men for målgruppa held det gjerne til midt på treet. Sensurmakta har rett i å skjerme dei minste frå spenningsscener. For foreldra freistar nok fjernkontrollen.

Håkon Tveit

Håkon Tveit er lektor i latinamerikansk kultur og historie ved Universitetet i Bergen og fast filmmeldar i Dag og Tid.