SKAL GRANSKA ANNE FRANK

Var det tilfeldig at nazistane fann Anne Frank, eller tipsa nokon nazistane om gøymestaden til familien, slik at dei enda i konsentrasjonsleiren og mista livet i 1944?

No skal ei gruppe med 19 etterforskarar, historikarar og kriminalteknikarar gå gjennom gamle forhøyrsrapportar og laga psykologiske profilar over mistenkte, skriv Politiken. Publikum skal kunna følgja prosessen via nettet, med film og oppdateringar frå Anne Franks Hus i Amsterdam, der dei har opna arkiva for gruppa.

BOK om NORSKE ØYDEGARDAR

Fråflytta stader kan ha ei eiga tiltrekkingskraft. Dei kan vitna om noko dramatisk, eller om nokon som har pakka saman og reist sin veg. I ei ny bok har Øystein Morten oppsøkt gardar folk har reist frå over heile landet. Nokre av dei er heilt overgrodde og nesten borte. Andre står om lag slik dei stod då folk flytta frå dei. I boka Norske ødegårder byr Øystein Morten og fotograf Pål Hermansen på glimt frå ei både nær og fjern fortid – både frå ballsalane på den store embetsgarden i Østfold og den vesle husklynga oppunder fjellet i Sogn.

Klassikar seld TIL 51 LAND

Per Pettersons litterære klassikar Ut og stjæle hester vart nyleg seld til det vietnamesiske forlaget Nha Nam. Dermed er boka selt til så mange som 51 land.

Det er også planar om at romanen skal verta film. Hans Petter Moland er regissør, og hovudrollene vert spelte av Stellan Skarsgård og Bjørn Floberg.

ottar@dagogtid.no