Svarteper for sinterklaas

Debatten om Sinterklaas og den svarte hjelparen hans, Zwarte Piet (Svarteper), held fram i Nederland. Der sminkar kvite seg svarte for å likne Svarteper. «Rasisme eller ikkje?» er kjernespørsmålet i debatten som råkar heile landet. No kjem den mest populære boka om Sinterklaas – biletboka Sinterklaas av illustratør Charlotte Dematons – ikkje ut meir. Det er tale om ein av dei største boksuksessane i Nederland. Om lag 150 millionar eksemplar har vorte selde gjennom åra. Men Dematons seier nei til nye opplag. Ho vil ikkje lenger bli stilt ansvarleg for rasisme. Kva ho sjølv meiner om den svartmåla konflikten, vil ho ikkje uttala seg om.

Trump og bøkene

Førstedame Melania Trump er god til å pynte, det har kome fram i media no i desember. Ho har pynta Det kvite huset med juletre og peparkakehus. Eit av juletrea skil seg ut: eit bokhyllejuletre. Journalistar har spurt om dette er bøker Trump kjem til å lesa. Svaret frå Melanias talsmann, Stephanie Grisham, er: «Nei, bøkene er ikkje kjøpte inn med tanke på tittel eller forfattar, men fargane på omslaget». Dei førre amerikanske presidentane er kjende for boktipsa dei sende ut kvart år. Trump seier sjølv han ikkje har tid til bøker.

Tvedt i strid

Dagbladet melde førre veke Terje Tvedts Det internasjonale gjennombruddet. Meldaren, Aage Borchgrevink, var atskillig meir kritisk enn meldinga som nyleg stod på trykk i denne avisa. «Profeten snubler i sitt eget skjegg», var ein av karakteristikkane til Borchgrevink. Kjetil Rolness reagerte sist helg med ein kronikk på medier24.no. «Når Dagbladet utdefinerer seg selv», er hans kommentar. Marie Simonsen i Dagbladet svarar med at «Kjetil Rolness synes Dagbladet har utspilt sin rolle, men fortsetter å skrive for avisen.»

ronny@dagogtid.no