Vinglas i fleisen

Ketil Bjørnstad er ein av våre mest kjende romanforfattarar. Han er òg kjend som komponist, men han har ikkje vore favoritt hos norske kritikarar. Det siste har han sett seg lei på, og i den siste romanen sin tek han eit oppgjer med kritikarstanden. I den sjølvbiografiske romanen Åttitallet, som kjem ut i dag, 20. oktober, kallar Ketil Bjørnstad Dagbladets bokmeldar Cathrine Krøger ein mobbar som forfylgjer han. Åtaket på henne går over mange sider i romanen. Han skildrar mellom anna korleis han ville kaste eit vinglas i andletet på henne.

«Jeg er en røff anmelder, og såpass må jeg tåle, men jeg reagerer på at han gjør dette i romans form», er Krøgers kommentar til Dagbladet.

Digital kortroman

Tjue svenske forfattarar har signert ein særeigen kontrakt med Bonnier Bookery. Dei skal skrive digitale historier for det nystarta forlaget som ligg under Bonnier. Historiene skal vera tilpassa «framferda» til lesarar og lydarar i den digitale verda, heiter det i ei pressemelding frå Bonnier. Jonas Bonnier, Malin Persson Giolito og Johan Theorin er tre kjende forfattarar som er klare for oppgåva.

Leikvoll i Russland

Jan Roar Leikvoll døydde så altfor tidleg. Han gjekk bort i 2014, berre 40 år gamal. Men forlagsfolk har ikkje gløymt han. I august 2015 fór Christian Kjelstrup til Bergen, opna bokhandel og selde éi einaste bok: Fiolinane av Leikvoll. I dag er Kjelstrup på plass i Kviterussland, der inntektene frå popupbokhandelen går til utgjeving av ein antologi med norske samtidsforfattarar, mellom anna med forteljingar av Leikvoll. Med seg har han – i tillegg til litteraturen – Ari Behn og Leikvolls syster Christine.

ronny@dagogtid.no