Om du såg Arrival (Denis Villeneuve, 2016) og lurte på kvar musikken kom frå, så vit at det var islandske Jóhann Jóhannsson som hadde komponert han. Eit lite søk gjer det klart at same komponist også stod for lydsporet til Villeneuve-filmen Sicario (2015).

Frå tid til anna kan eit enkelt verk leie ein inn i eit nytt, eigenarta musikalsk landskap, ikkje minst om ein brått vert eksponert for noko ukjent og spennande i ein kinosal. Jóhannsson viser seg ikkje berre å vere ein markant filmkomponist – bak seg har han ei rekkje fascinerande utgivingar, mellom anna på Deutsche Grammophon.

Fleire kritikarar har peikt på slektskap med profilar som Arvo Pärt og Henryk Górecki. Det går det an å forstå når ein lyttar til nyutgivne IBM 1401: A User’s Manual (opphavleg 2006), men likevel er dette noko ganske anna. Jóhannssons elegiske verk gjer bruk av ein IBM-instruksjonsteip frå 1960-talet, og får teknologien til å synge med si eiga røyst. Fascinerande – og underleg rørande.

Øyvind Vågnes