John Olav + Victoria (Brilliance), eit konsertopptak med John Olav Nilsen & Nordsjøen frå Victoria Cafe & Pub i Bergen frå tidlegare i haust, kjem ut måndag. Her kan det vere ein idé å vere raskt ute og kanskje til og med bestille på førehand. Det er tale om eksklusive greier: eit avgrensa tal signerte, farga vinylplater.

Opptaket er frå 29. september og sirklar i hovudsak rundt årets Nordsjøen, som er representert med seks av åtte songar. I tillegg er «Bensinbarn» med, frå Den eneste veien ut (2012). «Hull i himmelen», opningssporet på For sant til å være godt (2009), er siste spor på John Olav + Victoria, og tek oss avslutningsvis dermed heile vegen tilbake til byrjinga, til ekstatisk allsong. Utgivinga tek godt vare på den tette stemninga i eit lite lokale som har spela ei særleg viktig rolle i John Olav Nilsens liv.

Øyvind Vågnes