Det er nok av grunnar til at så mange kjenner seg løfta når dei forlèt salen etter å ha sett kinoaktuelle Moonlight, og fleire av dei har vore framme i entusiastiske omtalar i vinter, men ikkje så mange har nemnt musikken.

Fleire av dei ugløymelege scenene er prega av ein særs verknadsfull musikkbruk, som då gutungen Chiron, med kallenamnet Little (Alex Hibbert), får sin første svømmetime i dei glitrande bølgjene, eller då ein vaksen Chiron (Trevante Rhodes) overraskar barndomskameraten Kevin (André Holland) med eit besøk etter mange år.

Fleire enn meg bør hente fram det varierte lydsporet til filmen, som kombinerer Nicholas Britells små vakre originalkomposisjonar, den gamle klassikaren «Hello Stranger» (Barbara Lewis), Boris Gardiners «Every Nigger Is a Star», Mozart, og Caetano Velosos silkemjuke «Cucurrucucu Paloma» (tidlegare brukt i filmar av både Almodòvar og Wong Kar-wai) i ei og same speleliste.

Ta ein lytt – anten du har sett filmen eller ei.

Øyvind Vågnes