Ikkje berre er Willie Nelson (84) ein svært aktiv plate- og konsertartist, travelt har han også fått det med sitt lovlege sal av marihuana, nærare bestemt merket han har døypt «Willie’s Reserve». «Eg burde vite alt om kva som er kvalitet på slike produkt», sa han i eit intervju for litt sidan.

Trass i all denne aktiviteten har Nelson likevel tid til å sjå seg tilbake, og no er ei smekker nyutgåve av Teatro (1998) her.

Til dette albumet valde Nelson å samarbeide med Daniel Lanois, og det var eit skarpt val: Produsenten og musikaren plasserte innspelinga i Teatro, ein gammal kino i Oxnard i California, som gav albumet namn, og henta inn Emmylou Harris.

Den mest rikhaldige nyutgåva rommar sju uutgitte spor, og ein DVD med eit konsertopptak i Teatro laga under opptaka. Wim Wenders står for regien. Eit hefte inneheld intervju med både Nelson og Lanois.

Øyvind Vågnes