Country /
Samtidsmusikk

Trond Kallevåg Hansen:

Bedehus & Hawaii

Trond Kallevåg Hansen, gitar, elektronikk, feltopptak; Adrian Løseth Waade, fiolin; Geir Sundstøl, gitar, pedal steel, marksofon, optigan, xylofon; Alexander Hoholm, bass; Ivar Myrset Asheim, trommer.
Hubro HUBROCD2626

Musikken på Bedehus & Hawaii blei skriven som eit tingingsverk ved Sildajazz 2018. Plateselskapet kallar musikken «country & northern», og det er både språkleg kreativt og ganske presist. Musikken dreg solide vekslar på ting Bill Frisell og Ry Cooder har gjort i same gate, men påverknaden frå norsk folkemusikk og folkeleg musikk er tydeleg. Platetittelen seier eigentleg ganske mykje.

Sundstøl

Hansen har med seg Hoholm og Asheim, som han spelar trio med. Dei skapar eit enkelt og tydeleg rytmisk fundament, men akkurat så laust i snippen som musikken krev. Fiolinisten Waade, som nokon sikkert kjenner frå Skadedyr og Trondheim jazzorkester, spelar nokre enkle, melodiske kor – også desse fint tilpassa det harmonisk enkle utgangspunktet. Strengemeisteren Geir Sundstøl set eit umiskjenneleg preg på plata med sin klang og twang.

Bedehusmusikk

All ære til Trond Kallevåg Hansen for ni fine låtar som alle har ein slektskap eller skapar assosiasjon til bedehusmusikken. Det enkle melodiske, harmoniske og rytmiske utgangspunktet tek han vare på, men musikken vert lyfta inn i ein klangleg sfære som gjer uttrykket frisk og spanande. I desse dagar er bandet på lanseringsturné. Det er god grunn til å sjekka dei ut på både scene og plate.

Lars Mossefinn

Lars Mossefinn er lærar ved Voss gymnas og fast jazzmeldar
i Dag og Tid.