Jazz

Andreas Røysum Ensemble:

Andreas Røysum Ensemble

 Andreas Røysum, klarinett; Henriette Eilertsen, fløyte; Signe Emmeluth, altsaks; Marthe Lea, tenorsaks; Hans P. Kjorstad, fiolin; Joel Ring, cello; John Andrew Wilhite-Hannisdal og Christian Meaas Svendsen, bass; Sanskriti Shrestha, tabla; Ivar Myrset Asheim, trommer. MOTVIND RECORDS MOT7CD

I tillegg til å vera ein av initiativtakarane til kjerringa-mot-straumen-organisasjonen Motvind Kulturlag, som omfattar drift av både festival, magasin og plateselskap, er Andreas Røysum aktiv i ei handfull band både innan- og utanlands. Oppi alt dette har Røysum hatt tid til å skriva og spela inn musikk med ein tentett sett saman av gode vener og musikarkollegaer.

 Uvanleg

Instrumentariet er heller uvanleg, og musikken er ei salig blanding av referansar til afrikansk, indisk og balkansk folkemusikk, samtidsmusikk og jazz, og det ligg ikkje noko ironisk i bruken av ordet salig i denne samanhengen. «Det er i det heile tatt mykje kollektiv innsats, og heller få utstrekte soloparti. I god sosialistisk ande kjem enkeltprestasjonane i skuggen av ensemblet som heilheit», heiter det i presseskrivet. Det er for så vidt rett at musikken ikkje er dominert av ein serie langstrekte soloar (sjølv om dei heldigvis finst), men den motsetnaden mellom ensemble og dei individuelle stemmene som sitatet indikerer, er i beste fall ei keitete formulering.

Særpreg 

Det sentrale i musikken til Røysum er nettopp at det individulle særpreget og det kollektive uttrykket går opp i ei høgare eining. Samspelet mellom tabla og trommer illustrerer dette poenget plata igjennom. Eg kunne lett ha funne fleire andre døme på det same. Eit og anna har såleis Røysum teke med seg frå Ellington og Mingus, og godt er det.

Lars Mossefinn

Lars Mossefinn er lærar ved Voss gymnas og fast jazzmeldar i Dag og Tid.