Etter at Leonard Cohen gjekk bort seint i haust, har mange små minnestunder utspelt seg rundt platebunkar og spelelister verda over. Det er all grunn til å tru at vi også kjem til å sjå ein del nye album i tida framover, der vidt ulike artistar tolkar det som må vere ei av dei sterkaste songbøkene som finst.

Når svenske Ebba Forsberg i desse dagar kjem ut med Take My Waltz: Ebba Forsberg Sings Leonard Cohen (Gamlestans Grammofonbolag/Border), er det ei plate som på sett og vis kjem ut for andre gong, sidan Ta min vals: Ebba Forsberg sjunger Leonard Cohen alt kom ut i 2009, med svenske tekstar ved Forsberg og Mikael Wiehe.

Fleire vil kjenne Forsberg som tolkar av både Dylan, Cohen og Waits. (Om jag lämnar dig: Ebba Forsberg sjunger Tom Waits kom ut i 2015.) Det dreier seg om ein veteran med sikkert grep om stoffet. Cohen-tolkingane hennar, anten det no er på svensk eller engelsk, er respektfulle og fint framførte: Målet er ikkje å gjere songane om til noko heilt nytt, men å løfte dei fram utan å ta vekk det som er den indre kjernen i dei.

Øyvind Vågnes