Jazz/rock

Hedvig Mollestad:

Ekhidna

 Hedvig Mollestad, gitar; Susana Santos Silva, trompet; Marte Eberson og Erlend Slettevoll, tangentinstrument; Torstein Lofthus, trommer; Ole Mofjell, perkusjon. RUNE GRAMMOFON RCD2215

Hedvig Mollestad fekk mykje og velfortent ros etter urframføringa av tingingsverket på Vossa Jazz i 2019. Bandet hadde så avgjort fått musikken under huda. Framføringa framstod som «plateklar». Mollestad har likevel valt å ta musikken og musikarane med i studio i vinter. Erlend Slettevold har teke plassen til Jon Balke, elles er bandet det same som på Vossa Jazz.

 Blå tråd

Dei seks låtane er ganske laust sambundne. Kontrasten mellom lyriske balladar og riffbaserte rockelåtar går som ein blå tråd gjennom plata. Det er eigentleg villeiande å kalla låtane «A Stone’s Trow», «Antilone» og «Ekhidna» for riffbaserte. Låtane blir innleidd med gitarriff av beste Moldestad-merke, men desse låtane er små verk i miniatyr der ein masse spanande musikalsk kommunikasjon går føre seg flytande mellom det arrangerte og det improviserte.

Overraskande grep 

Mollestad gjorde eit over­­-
raskande grep ved å utelata bassen i instrumentariet, men det gjev god meining både når ein lyttar til Lofthus’ overveldande trommespel, der interaksjonen mellom basstromme og golvtam er ein vesentleg dimensjon, og ved at dei to pianistane får ekstra boltreplass. Silva har også ei nøkkelrolle ikkje berre som klangleg kontrast, men også som særs inspirert improvisator.

Ekhidna har sikkert hatt godt av litt finpuss og ein ekstra runde i studio. Plata framstår som heilstøypt utan at friskheita og inntrykket av spontanitet er vekke.

Lars Mossefinn

Lars Mossefinn er lærar ved Voss gymnas og fast jazzmeldar i Dag og Tid.