Viser/Jazz

Siril Malmedal Hauge:

Uncharted Territory

Siril Malmedal Hauge, vokal, mandolin; Martin Myhre Olsen, saksofonar; Torgeir Hovden Standal, gitarar; Kjetil André Mulelid, piano; Martin Morland, bass; Henrik Lødøen, trommer; Adrian Løseth Waade, fiolin; Isa Caroline Holmesland, bratsj; Kaja Fjellberg Pettersen, cello.
Jazzland Recordings 377 910 2

Langevåg har fostra nok ein musikar det er verdt å merka seg. Siril Malmedal Hauge (27) er ute med den første plata der ho har gjort det meste sjølv. Ho har gått på jazzlinja i Trondheim og alt nådd å vera med på ei god handfull plater. I fjor kom duoplata Last Things saman med gitaristen Jacob Young, og ho fekk Jazztalentprisen frå Moldejazz.

Overraskande

Ho har skrive all tekst og musikk til plata og produsert henne saman med Dag Erik Johansen. Strykearrangementa er skrivne saman med Martin Myhre Olsen. Det sistnemnde er diverre ikkje den sterkaste sida ved produksjonen. Det er eit stort stykke arbeid Hauge har lagt ned, og det er grunn til å gratulera med resultatet. Fleire av låtane hevar seg over nivået «godt pop-handverk», og tekstane har på sitt beste overraskande metaforar som i opningslåten «Transfixed». Med eit fint forma pianokor av Mulelid er dette eit av høgdepunkta på plata.

Ein fest å høyra

Inspirasjonen frå Joni Mitchell både i komponeringa og det vokale er tydeleg, men her er totalt sett såpass mykje særpreg at dette ikkje blir påtrengande. Ikkje minst er arrangementa med på gje låtane karakter. Bandet syner ein lojalitet til prosjektet som tener dei til ære. Det er ein fest å høyra på Hauge og musikarane hennar. Ein debut som er lovande og vel så det.

Lars Mossefinn

Lars Mossefinn er lærar ved Voss gymnas og fast jazzmeldar
i Dag og Tid.