Kyrkjemusikkfest i Lofoten

Det kjem ein sommar, og med den forsiktige, men ambisiøse musikkarrangement av ulikt slag. Seks dagar med Lofoten Internasjonale Kammermusikkfest vert det til dømes 5.–11. juli, med eit program som samlar fleire av landets fremste musikarar: Arvid Engegård stiller både med strykekvartett og trio, og fastbuande og tilreisande kan også glede seg til å høyre Guro Kleven Hagen (fiolin), Ann-Helen Moan (sopran), Eivind Ringstad (bratsj), Louisa Tuck (cello), Elise Båtnes (fiolin) og Björn Nyman (klarinett).

Ein kan vel neppe tenkje seg ei vakrare ramme for ein festival, med 25 konsertar rundt om i landskapet i Lofoten, frå Flakstad kyrkje i vest til Svolvær kyrkje i aust. Kor trøytte vi enn er av smittevernsrestriksjonar, er det ikkje tvil om at kyrkjerommet kan by på eit særleg nært møte mellom musikar og eit lite publikum. Og når du kjem ut i sommarkvelden etterpå, er havet rett der. Det kan ingen pandemi endre på.

Ø.V.

Low feirar klassikar

20 år har gått sidan Low gav ut Things We Lost in the Fire, eit kjært album for bandets lyttarar, og det er vel verdt ei markering. Plata er tema i ei fersk utgåve av podkasten «Life of the Record», der Mimi Parker og Alan Sparhawk fortel om samarbeidet med produsent Steve Albini i Chicago og korleis utgivinga kom til å markere eit vendepunkt i karrieren, med eit meir ekspansivt lydbilete enn før, der strykearrangement, vokalharmoniar og ulike andre teksturar fekk ein prominent plass.

Ei fin stund, og eit godt høve til å leite fram albumet, som held seg knallgodt. Low har også fått laga eit «visuelt album» av utgivinga som det går an å finne vegen til på YouTube.

Ø.V.