Pop/Jazz

Relling:

Lower Your Guard

Harald Relling Nielsen, vokal; Vegard Lien Bjørkan, hammondorgel, synthar; Tore Hodneland, gitar, pedal steel; Åsmund Mattias Smidt, trommer; Ola Kvernberg, fiolin (7). ØRA FONOGRAM OF144

Relling tok seg til finalen i Jazzintro i fjor via kvalifisering på Vossa Jazz. Der imponerte dei juryen og tilhøyrarane med eit overraskande friskt og popifisert uttrykk som blei framført trygt, stilsikkert og fullt av sprudlande overskot. Alt dette som overtydde oss då, har dei teke med seg på debut-CD-en Lower Your Guard.

Eterisk vokal

Vokalisten og orkesterleiaren Harald Relling Nielsen har komponert sju av dei åtte låtane. «The Depth» er signert Smidt. Nielsen er inspirert av musikalkomponisttradisjonen Tin Pan Alley, men dreg også vekslar på den meir glattbarberte R&B-tradisjonen. Det må seiast at tekstane stundom er farleg nær å vera ei røys med klisjear, men oftast er truverdet intakt. Mange av temaa er langstrekte, mollstemte linjer oppå eit komplisert pulserande komp. Det eteriske vokaluttrykket er med på å forsterka kontrasten mellom melodilinje og komp, men bandet byggjer også opp lengre musikalske forløp der dei på effektivt vis utnyttar det dynamiske. Både tittelkuttet og «Hiding Space» er gode døme på dette. Her fortel bandet historier som er meir djuptpløyande og tankevekkande. Sistnemnde får ein ekstra dimensjon med innhoppet til Kvernberg på fiolin.

Kvernberg

Ola Kvernberg har elles gjort ein strålande innsats som produsent. Det leikne i uttrykket er der i fullt mon, men også den andre og mørkare sida ved Relling har sin naturlege plass. Relling er ein spesiell plante i den norske musikkfloraen. Unn deg å bli betre kjend med dette særmerkte bandet.

Lars Mossefinn

Lars Mossefinn er lærar ved Voss gymnas og fast jazzmeldar
i Dag og Tid.