Jazz

Julia Hülsmann Quartet:

Not Far From Here

Uli Kempendorff, tenorsaks; Julia Hülsmann, piano; Marc Muellbauer, bass; Heinrich Köbberling, trommer.
ECM 2664

Julia Hülsmann Trio er ein konstellasjon som har halde saman i over 17 år. No har dei fått selskap av den berlinbaserte tenorsaksofonisten Uli Kempendorff. Han har i dei seinaste åra delt seg mellom utøvande musikar og pedagog. Med trioplata Sooner And Later (ECM, 2017) og Kurt Weill-plata A Clear Midnight (ECM, 2015) saman med Theo Bleckmann har Hülsmann lagt lista høgt. Med Not Far From Here innfrir kvartetten. Kempendorff glir fint inn i ensemblet. Trioen har eit fleksibelt samspel, og med saksofonen uttrykkjer dei seg minst like leikent. Kempendorff spelar coolt også i ein stilistisk forstand med reinskorne, detaljrike linjer.

Bowie

Hülsmann har komponert fem av dei 13 låtane. Dei tre andre bandmedlemmene har bidrege med to kvar, og så har dei tolka Bowie, Metheny og Mays «This Is Not America» ganske fritt. Hülsmann avsluttar plata med ein variasjon av same låt.

Varemerke

Det meste går i ballade eller medium tempo, men sjølv i den raskare «Streiflicht» er det ein patina av kontemplasjon i musiseringa. Spenninga i musikken ligg mykje i å leggja band på seg. Det intrikate skal serverast med tilbakelent eleganse. Dette var varemerket til trioen, og kvartetten fører arven vidare. Stort sett lever dei opp til idealet gjennom det meste av plata, men ved eit par høve er fasinasjonen vekke – overraskande nok i tittelkuttet, men det er ei mindre innvending som ikkje må hindra folk i å sjekka ut Julia Hülsmann Quartet.

Lars Mossefinn

Lars Mossefinn er lærar ved Voss gymnas og fast jazzmeldar i
Dag og Tid.