Jazz

Mathilde Grooss Viddals Meditations & Prayers:

Stabat Mater

Mathilde Grooss Viddal, sopransaks, Bb-, bass- og kontrabassklarinett; Harpreet Bansal, fiolin; Per Willy Aaserud, trompet og elektronikk; Børge-Are Halvorsen, tenorsaks; Øyvind Brekke, trombone. Giraffa Records GIR 1907

Det er all grunn til å lytta når Mathilde Grooss Viddal er plateaktuell, enten det er som leiar for Friensemblet, eller som her, med eit heilt nytt ensemble. Målet med prosjektet er å musisera/improvisera rundt salmar, koralar, mantra, bøner og meditasjonar som er felles for alle kulturar, identitet og tru. Tid for ettertanke i ei elles fragmentert og uroleg verd, seier Viddal om utgjevinga.

Improvisasjon

Viddal serverer ikkje fikse idear og lettvinte løysingar. Prosjektet er det jobba med i ein treårsperiode. I utgangspunktet var det ein trio som spelte musikken, men musikk og besetning har endra seg undervegs. Det er naturleg, fordi improvisasjon er eit så viktig element i konseptet. Kyrkjetoneartar som grunnlag for improvisasjon er ikkje jazzen framand for, men her er det andre parameter som blir sterkt vektlagde, som til dømes dynamikken. Det at ensemblet ikkje har med verken akkordinstrument, bass eller trommer, gjer at klang og dynamikk står fram som musikalske berebjelkar.

Suiteliknande

Stabat Mater er eit suiteliknande verk som er sett saman av åtte delar, der utgangspunktet er kjende salmar i tillegg til «Finlandia-hymnen» av Sibelius, «For Turiya» av Charlie Haden og «Meditasjon» av orkesterleiaren sjølv. Ho har også komponert «Peace», som avsluttar plata. Ensemblet har arrangert musikken, og det er mykje flott musisering på plata. Viddals rytmisk spenstige fargelegging med bruk av mest heile klarinettfamilien er ein gjennomgåande attraksjon, og den gylne og overjordiske augneblinken er fiolinspelet til Bansal på «For Samadhi».

Lars Mossefinn

Lars Mossefinn er lærar ved Voss gymnas og fast jazzmeldar
i Dag og Tid.